同SP、KX、ZX、RZ道別之後，唔使講主角群就會繼續佢地嘅故事，不過佢地做啲乜我就唔知。
而由而家開始將會由我同Air另兩個本來係二打六嘅主角升做主角，開始呢個外傳。
咁都要講少少背景先。
事緣行咗咁多次蝴蝶山路徑，成日係個觀景台都望到北方都有座大山，
有次走去問吓啲阿山，話嗰座叫雞公山，佢都行過，覺得易過大刀屻，但係沿途都無瓦遮頭。
自嗰一刻起，我就準備終有一日，都要去嗰個山探一下。
而之後睇吓中原地圖，咦，見到蕉徑真係有好幾條路都可以上到雞公山(雞公嶺)喎，
但係實際條路係點，真係唔知。
加上有咁多路上去，都唔知邊度好啲，就同Air商量過要去探一探入口，
等終有一日，而家希望係10/3(六)，一探雞公嶺。
不過題外話呀，而家呢一刻，9/3。
星期一睇天文台呢，都係話星期四就有霧、星期五天陰有雨，星期六就相當清涼，同埋可能有一兩陣微雨。
前兩日睇呢，就星期四有霧，星期五有霧，星期六就凍啫，無霧。
跟著琴日睇呢，就星期五有霧，星期六有霧，又凍。
你使唔使咁早發功呀Air。
-----
外傳開始。
話說主人公個任務只係「從雍盛到蕉徑」，任務完咗，攞咗exp，由於佢地係追求高速破關之人，立刻番去打第二個任。
而我地就係蕉徑完咗之後，繼續遊戲關於蕉徑嘅補完部份，是為外傳。
雖然話就話知道蕉徑有路可以上雞公嶺，但係係地圖上同實際上見到嘅嘢始終唔同，
再加上係鄉村入面啲小路無係平時行嗰啲路咁清楚，所以探路係有必要，
順便當遊覽一下蕉徑不為我地知嘅另一面。
同主人公道別後，我地就沿住平時條直路向前行，行咗一分鐘，就已經離開平時見到嘅村屋群，
亦即係我地心目中嘅蕉徑範圍。
(白山黑水。雞公嶺仍然俾白霧包圍，而呢度啲河水就係黑色的)
係呢度，見到條大馬路，而且周圍做緊好多工程。
而我同Air已經呆咗係度，因為根本上唔知行邊一邊。
無耐之下，立刻舉行戰略會議，兩個傻仔攞住路邊一舊石頭係馬路度畫地圖。
最後得出結論，向著馬路其中一邊，應該係更深入嘅方向行。
首先見到嘅就係程屋莆入口。
(程屋莆。係中原地圖就叫陳屋埔。我都唔知邊個姓先啱)
一路向前走，見到有條相對大嘅河，要爬一啲石級再行。
呢條就係雙魚河啦，不過似死魚河多啲，因為都係黑同臭。
而河嘅對面又有番啲人煙，而且見到村公所添，到咗老圍啦。
而且係呢度仲見到有52K小巴站，都有人係度等小巴。
(遠處可見村公所)
再繼續行入去，到呢個時候個太陽都開始出黎，天氣開始熱。
加埋地面上啲石屎路，都令我地有啲夏天嘅感覺。
事後知道原來嗰日個氣溫最高有成26，7度，同朝早比都相差幾遠。
另一方面我地亦都到咗新圍，村如其名，呢度啲屋洋樓多啲，睇落個樣都新啲。
(新圍。真係哂到反光)
跟著車路一直行行到尾，以車路黎講係一個dead end。
而呢到開始，就只係得番啲鄉村小路。
而同時呢度亦都係小巴52K嘅起點，彭屋。
竟然俾我地係呢度搵到平時成日搭嘅小巴嘅起點，真係估你唔到。
影相嗰時都有架小巴係度等客，而我地為咗影彭屋塊牌係度等(架車阻住咗)，
我地望佢快啲走，佢又望我地以為係咪客仔，唔係呀，快點開車啦。
(可以一路坐一路等小巴)
當車路都行哂，問題就黎啦。
事前同Air討論過嘅入山路係係車路嘅中段就有路入，但係而家路都無啦，咁入山路係邊？
無奈之下就再行入啲，咦，有兩個阿叔喎，坐咗係棵樹下面，問吓佢地先。
點知佢地竟然都唔知，仲笑著咁同我地講話你地都唔知搵唔到架啦，被恥笑了。
不過佢地話可以行一啲去睇吓嘅，無啦，入啦。
(Air名之曰︰369之地)
去到呢度就諗起一個問題︰點解蕉徑叫做蕉徑？
一直以黎，我地只係當蕉徑係一個地名，就如粉嶺之於粉嶺，旺角之於旺角。
但係，粉嶺曾有古名粉壁嶺(其中一個解釋)，旺角曾有古名芒角，
因粉嶺山有粉壁，旺角滿地芒草。
咁蕉徑呢？呢個答案我唔多講，試用一圖解之。
(蕉．徑)
蕉徑。
蕉．徑﹗
傳說中，彩虹嘅盡頭，有寶藏。
與主人公道別後，兩個NPC鍥而不捨地向彩虹嘅盡頭深入。
無窮無盡嘅芭蕉樹，穿插其中嘅羊腸小徑。
終於，發現寶藏︰蕉．徑，到達﹗
(睇落好好正嘅樹群同睇落好假嘅Air)
本來已經俾太陽曬到慶慶地嘅我地，一見到呢個樹群，簡直係喜出望外。
事關嗰度俾樹群包圍，溫度都立即下降不少，可以用「清涼」黎形容。
加上樹間空間好大，如果有嘢食，絕對可以帶嘢食過黎野餐，享受涼風加美食，
不錯不錯，不過前提係呢塊地唔係私人地先得。
(踏足真正蕉徑，感覺不同凡響)
不過，話就話係好多樹，但係其實呢啲唔係芭蕉樹，而係棕櫚樹，
而且呢，呢條都真係一條小徑，長度唔太長，不過，見到呢條小徑，
就唔難想像當年幫呢度命名嗰個人所見到嘅景象。
不過有塊好無謂嘅告示牌寫住「慢駛」。
第一下嘅反應已經衝口而出︰「慢？慢乜Q？」
Air立刻應曰︰「駛？駛乜Q？」
我當下頓悟，Air嘅答案更好。
呢條咁Q窄嘅路仔，莫講話慢，就連任何一架車都無可能駛得過，整塊用唔著嘅牌，就係用唔著。
(一人行都嫌窄啦，駛乜Q呀)
終於離開蕉．徑。始終過於留戀呢個地方都唔太好，畢竟我地仲有另一個目標要去達到。
到咗呢度，車路無哂，得番兩個人左右闊嘅小路，遠離人煙。
周圍愈黎愈多雜草同農地，視野唔使講，愈黎愈開闊，同平時一行山見到嘅蕉徑景色完全唔同，
終於由近郊變成完全郊區嘅景色。
(破爛嘅窗戶。呢啲荒廢景色愈黎愈多，農村沒落圖？)
老實講，行到呢度已經完全睇唔返平日所見到嘅蕉徑景色，
周圍有好多草地同一啲田地，同埋偶爾路過嘅鐵皮小屋。
呢度人影都疏落啲，又無乜廢氣污染，望吓周圍都係青山，綠水就無啦。
不過Air話呢啲太偏僻，都係出番啲，大約老圍新圍嗰度好啲。
呢啲就見仁見智啦。
(係陰涼嘅大樹下歎世界。嗰陣雖然唔攰但係都忍唔住要坐陣享受人生)
係上圖都見到，又有分岔路，一左一右，我地決定先走右路探一下，
點知行上去發現係dead end，除咗有隻狗吠之外，得個老人家坐吓度無嘢做。
走去問吓佢有無得上山啦，點知唔知係咪企太遠聽唔清，定係佢老得濟，
總知問到一舊雲。
咁就回到起點，今次走左線。
一行，咦，有路修葺緊喎，係好事，事關前人所言條路應該頗出名同易搵，
唔通係政府修埋條上山路？
(Sor X ry 咯，地政總署)
點知行入去望一下，發覺唔對路，條路雖然係上山，但係愈黎愈窄，仲要愈黎愈多屋依路而建，
搞乜？
行到一條平地位，右手邊有家鐵皮屋，突然有兩隻成個人咁大嘅狗突然跑過黎，淨係啤著你，
隔住個鐵絲網「胡胡」聲咁，
如前人嘗言，會吠嘅狗唔會咬人，但係相反，唔吠嘅狗呢，就……
好兇狠，佢地個眼神，講真。
再上啲，見到個阿叔企係一間屋個屋頂度，好似做緊維修，就走去問佢啦，原來又係此路不通。
同佢傾傾傾，大約只係得到兩個資訊︰頭先嗰個阿伯嗰度其實係good end，另外就係best end應該係出咗蕉徑，行一段粉錦公路先會到。
謝過而回，又要行嗰條平路啦。
今次嗰兩隻狗又黎過，一直行一直跟到我地離開，然後就走嗰陣就狂吠。
咁唔代表佢地唔會咬人，而係因為我地離開緊佢地個範圍，吠黎話俾下一個橫頭隻狗，叫佢幫手隊冧我地咋。
當嗰兩隻「向左狗」同埋「向右狗」，等身大，隔住鐵絲網，同你個頭唔夠20cm距離咁吠，真係膽都喪，
Shaken兼且Wavering，
愈行愈快，行到離開番三，五米個人先定啲。
影番張相先，而Air就繼續敗退。
(「嘩好向左走向右走驚呀 走先」by Air)
到蕉徑最深處探索亦都告終。
由於大約知道嗰個九唔搭八阿伯個位可以上山，咁下一步就係探索係蕉徑以外嘅另一個入口。
雖然呢兩個入口同我地心目中，係老圍、新圍附近嗰個入口唔同，不過都算啦，起碼有入口可以行。
畢竟呢個雞公嶺實在有太多上山路線，淨係睇中原地圖都有好幾條，隱藏路線就更多啦。
行到番黎彭屋，突然見到有架綿羊仔駛過，有個細佬同我地揮手。
其實呢個細佬頭先入蕉．徑嗰陣都見過，佢係自己個鐵皮屋外面個庭園同我地揮手，係咁Hi我地，
我地又Hi番佢，好似小學嗰陣咁，而間屋仲有個阿婆係咁用枝棍個庭園個入口，以為佢傻架啦，
但係過咗陣個細佬同係屋入面出黎個女人(應該係阿媽)一齊坐綿羊仔出去，
個阿婆又好正常咁揮手喎，都唔知做乜。
總之而家又係嗰度見到對母子啦，不過今次我地走緊，就同佢係咁goodbye啦。
問佢叫咩名啦，佢就係咁話「我唔識你地架﹗」鬼唔知咩。
(不過Air話嗰個應該係佢菲傭)
繼續出番去，撞到係369之地遇到嘅阿叔，佢地問我地搵唔搵到入口，
我地如實相告，佢地又笑笑口咁話佢地都唔知入口係邊，
叫我地加油咁話啦。
(順便影吓係度瞓覺嘅黑貓)
出番黎，又見到兩隻大狗。
不過今次係一對夫婦帶佢地行吓路，而呢對大狗仲俾人訓練到識睇車過馬路。
每次過馬路之前行到去個落壆位就坐係度，等主人望吓有無車先，望完再帶佢地行。
一直跟住佢地行，一路讚嘆呢兩隻狗好乖，雖然細啲嗰隻仲未定性，有時會唔聽笛自己行。
另一方面都會讚個主人教狗教得好好。
跟住馬路出到蕉徑出口，就分道揚鑣啦。
(啡色嗰隻係大狗，好有大將之風，前面嗰隻黑色俾佢遮住咗，背景係雞公嶺)
開始沿住粉錦公路前行。真係估唔到今次竟然要行粉錦公路，又可以行吓路啦。
呢條路我都行咗起碼兩次啦，加上只有一條直路，繼續遠望雞公嶺，漫步而行。
行到呢個時候個天愈黎愈猛，我諗都有廿幾度啦。
(營盤村路牌。連青苔都生埋)
呢度其實有好多路睇上去可以上山，但係點行上去真係唔知。
我地行行行，曾經行過橋頭，即係雙魚河穿過粉錦公路嘅交界位。
再行，發覺只有車場，點睇都唔會走入人地車場然後上山架？
無奈折返，唯有去我地曾經聽過維修屋頂阿叔所講嘅上山路線其一︰有大水管，又係過河條橋附近(即橋頭)，又有條河嘅地方。
係，因為連名都無嗰度，所以我只能咁樣形容嗰個地方。
(事後睇番，原來其中一班行山友就係行呢條路，又係度影過相)
行到過去，見到有好斜嘅樓梯，必乃上山路也﹗
遂士氣大振，急步上山。
但係呢條樓梯起碼有蝴蝶山程度，行咗一陣就發覺太急，要邊行邊休。
(影得咁震就知我地行得幾快)
一直上上上，上到去，竟然發現又係孝子賢孫…﹗
十分無奈，行咗咁耐樓梯，竟然又係dead end。
條路仲要咁鬼靚，唉。
(唯一嘅安慰獎係可以一觀大刀屻之貌)
行到呢個時候，疲態己現，加上時間已經唔早，著草為妙。
回程時見到其實有另一條平路，貌似係去啲村落嘅，不過嗰陣見到有急上樓梯而不予理會，
而家咁鬼肚餓，更加無力再戰，功敗垂成。
最後回到橋頭，搭番程77K回歸，其時已11:30am，比預算時間大幅延長。
(返名都M記食個$20餐，食到12:55pm，都算係咁啦)
是日可以話成功，都可以話失敗。
成功嘅係，已經確認到有兩處可以上山，亦即係話，10/3，可以一戰。
失敗嘅係，兩處嘅入口都未搵到，10/3，仍要一戰。
-----
(十分污糟，濕泥之過)
今次有咩特別嘢好講呢？
其實無乜，只係今次又係泥濘之役，加埋自己因為行上級者向，搞到成鞋都有泥。
不過好就好在，因為其後有太陽出，本身啲濕泥曬多兩曬，就會乾咗自己跌番落黎，
又或者因為乾咗，番到屋企洗都好易洗得甩。
不知不覺呢對鞋都已經著咗八次。
點解記得咁清楚都係因為而家有紀錄，每次行完都會寫記事，而第一篇記事正好就係買咗呢對鞋開始。
期望呢對鞋可以當每次著$3，$294/3 = 98次。
當我每星期著佢一次去行山，98 / 52 = 1.88年。
希望我兩年後仲可以寫呢對鞋，當然都希望我真係可以寫多90次記事啦。
後記
行左成朝都搵唔到入口，而且仲要俾兩隻向左狗向右狗嚇到三魂唔見左七魄，條氣梗係唔順啦，結果過左兩日就忍唔住出絕招 --- 搵攻略
http://www.wildconqueror.com/web/outdoor812/KeiKung.htm
呢班人就係由逢吉鄉上，打石湖落，睇下個出口喺邊就知要邊度入la
咪住…點解咁熟口面ge?!
我地無行錯路喎…但上山究竟係邊條路呢 ?? 無理由要孝子賢孫幫手 teleport 卦?!
咁都返左屋企，真係到行嗰日先算la
-----
過去紀錄︰
蕉．徑系列
藍藍天空高掛我的霧—蝴蝶山至蕉徑5公里+探路?公里兩個短Trip 林村系列
無間道(三)—斜風細雨終須歸—粉嶺、林村、大埔墟、粉嶺 無間道(二)—豬扖、火車、文武廟—粉嶺、林村、大埔墟、粉嶺 無間道(一)—林深不知村—粉嶺、林村、大埔墟、粉嶺南丫島系列
在乎山水之間 24/2/2012 南丫丫丫丫丫丫丫丫 行運一條龍 蓬瀛仙館-車公廟-黃大仙Lost—蝴蝶山至蕉徑5公里 都是Air惹的禍—麥理浩徑第三段(北潭凹 至 水浪窩)—M07Paul Regret—北大刀屻10公里安車平一路—流水響斜路遊時也命也—蝴蝶山6公里頭柒—北大刀屻10公里M記前哨戰—北大刀屻10公里
23:57 我地三個等Lift
我買左Bonaqua 一枝 其實都夠用架啦
基本上係0:05分 同初號機第一炮時間一樣
途中 KX問點解唔係山腳做熱身
(0:33) 上到個亭啦
45度斜 (0:49) 本來想影個三角網測站 但太黑影唔到
